भांगरभूंय | प्रतिनिधी
गोंय अपघाताची राजधानी जाल्या, अशी आमकां लजेक घालपी प्रतिक्रिया 40 वर्सां पयलीं राज्यपाल डाॅ. गोपाल सिंग हांणी उक्तायिल्ली. म्हणजे 1980 च्या दशका पसून गोंयांत अपघात वाडल्यात. हाचेर साबार जाणांनी उपाय केले. मात, समस्या उणी जावंक ना. उरफाटी ती आनीक वाडल्या. पयर एकाच दिसा तीन कडेन जाल्ल्या अपघातांत पांच जाणांक मरण आयलें. तातूंत केपेंच्या एका तरणाट्याचोय आसपाव आसा. ताची स्कूटर बालरथाक आपटली, कुर्टे दोन ट्रकां मदीं चिड्डून कंडक्टर सोंपलो, तर काणकोणां
दोन मोटारींची टक्कर जावन एकाच कुटुंबांतलीं
तिगां सोंपलीं. राज्यांत वर्साक उणेंच 300 लोकांक रस्तो अपघातांत मरण येता. जखमी कितले जातात, ताचो खरो आंकडो मेळना. कारण किरकोळ अपघातांचे पंचनामे जायनात.
अपघात कित्याक जातात, ताचेर प्रत्येकाचें वेगळें मत. मात, येरादारीचे नेम पाळप ना, वेगान, सोरो वा ड्रग्सांचे घुंवळेंत गाडी चलोवप, झेम येवप, मोबायलाचेर उलोवप, रस्त्याची बाबत स्थिती, वाहनांचो वाडिल्लो आंकडो, फाटल्यान वाग लागिल्ले भशेन सदांच ताकतीक………. अशीं जायतीं कारणां अपघातां फाटल्यान आसात. रस्त्याचेर मात्सो जागो दिसलो काय मदींच घुसपी हजारांनी गाडयेकार आसात. मुखार सिग्नल पडलां हें खबर आसतनाय कांयजाण पाळणींतल्यान वाट काडची तशे मुखार वतात. गाडयेकारांक शिस्त उरूंक ना. केंद्र सरकारान तालांवांत दुपेट, तिपेट वाड केल्या खरी, पूण तिका लागून अपघात उणे जावचे बदला लोकांची तिडक मात वाडल्या, हें मतदारांक खूश दवरपी कांय राज्य सरकारांक होलमलां, देखून ते दंड दितना आदलोच दितात.
गोंयांत कांय जाग्यांचेर सदांच येरादारीची कोंयडी जाता. थंय पर्यायी मार्ग तयार केल्यार कोंयडेक लागून जावपी मनस्ताप कमी जातलो. वेळूय वाटावतलो. गाडी एकाच जाग्यार 10- 15 मिनटां आडकून उरली काय मागीर फुकट गेल्लो वेळ भरून काडपाक गाडयेकार मुखार शक्य तितले वेगान वतात आनी कोणाक तरी धपको दितात. सिग्नलांचेरुय गाडयांची लांब रांको लागतात. (मजा म्हणल्यार सिग्नलां बंद आसतात, तेन्ना एकूय रांक लागना.) गोंयांत आतां गाडी चलोवप म्हणल्यार मनस्ताप, ख्यास्त कशी. बसी 10 मिण्टांच्या प्रवासाक अर्द वर आनी एक वराच्या प्रवासाक देड ते दोन वरां घेतात. आगशे, कुठ्ठाळे तर…..!! म्हणटकच गाडी घेवन येवपी कोणाकूच दोश दिवपाक मेळचो ना. तातूंत रातीं आठा उपरांत कांय शारां सोडलीं जाल्यार हेर कडेन बशी बंद. सण, सुटये दिसा दीसभर. फाटलीं दोन वर्सां कोरोनाक लागून बंद जाल्ल्यो भोवतेक बशी सुरू जावंक नात. खुद्द बसधनयांनीय हें कबुल केलां. गिरायक जायना म्हूण ते खंय बसी चलयनात. दुसरे वटेन बसी नात म्हूण प्रवासी स्वताचे वाहन वापरतात.
अपघात आनी येरादारीचे कोंयडेक आनीक एक गजाल जापसालदार आसा. बस प्रवासी घेवपाक अर्दी रस्त्याचेर उबी रावता. फाटल्यान मागीर गाडयांचें पुरसांव. पूर्ण बस रस्त्या भायर रावतली, येवपी- वचपी गाडयांक त्रास जावचो ना, अशे बसस्टाॅप तयार करपाची गरज आसा. अर्थात हें सगलेच कडेन शक्य ना. मात, गाडयांचो वाडटो आंकडो पळयल्यार ही काळाची गरज, हें कोणूय सांगतलो. दुसरी गजाल म्हालवाहू ट्रक, ट्राॅली, कंटनेर, छोटा भीम रिक्षेची. हीं वाहनां खूब सवकास वतात. फाटल्यान हेर वाहनांचें लटांबर. फुडल्यान गाडयो येतात. एक- देड किलोमिटर मेरेन फाटल्या वाहनांक ओव्हरटेक करपाक मेळना. ह्या म्हाल व्हरपी ल्हान व्हड गाडयांक वेगळो लेन करून दिवचो. नाजाल्यार तांकां फक्त रातचीं साडेआठ ते सकाळीं साडेसात मेरेनूच येरादारी करपाक दिवची.
शाॅर्टकट मार्ग तयार केल्यार, आसा ते सुदारून येरादारी तेवटेन वळयल्यार राज्यांतल्या मुखेल रस्त्यांचेर जावपी कोंयडी उणी जातली. उत्तर गोंयां पुरतें उलोवचें जाल्यार चोडण- रायबंदर, बेती – पणजी पूल, अस्नोडें बायपास बेगीन जावंक फावो. कांय वर्सां पयलीं दुचाकीं खातीर वेगळो लेन करपाची घोशणा जाल्ली. कितें जालें तिचें? रस्ते रुंद करून वेगळे लेन करप शक्य ना? अपघात टाळपाचो सगल्यांत सोंपो (सगल्यांत कठीणूय) उपाय आसा. तो म्हणल्यार दरेकल्यान स्वता येरादारीचे नेम पाळून, तकली जाग्यार दवरून, आपल्याक लागून दुसऱ्याक त्रास जावचो ना हाचो विचार करून…. आनी गरज तेन्नाच गाडी चलोवपाची. तयारी आसा तुमची ?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
