भांगरभूंय | प्रतिनिधी
सरपंच, उपसरपंचांची आयज निवड; मर्जींतल्यांत सरपंचाच्या कदेलाचेर बसोवपाचे आमदार, मंत्र्यांचे यत्न?
भांगरभूंय । प्रतिनिधी
पणजीः सरपंच तशेंच उपसरपंचपदाचेर आपले मर्जेंतल्या उमेदवारांची निवड करपाचे आमदार तशेंच मंत्र्यांनी यत्न चलयल्यात, पूण तांची गणितां चुकोवपाची तांक अपक्ष पंचामदीं आसा. अपक्षांक ‘बाबापुता’ करपाचें सध्या सुरू आसा. दरेके पंचायतींत एक वा दोन अपक्ष वेंचून आयिल्ल्यान तांचें मोल वाडलां. गोंयांतल्या 186 पंचायतींच्या सरपंच तशेंच उपसरपंचपदा खातीर आयज वेंचणूक जातली. उमेदवारी अर्ज सादर करपा सयत वेंचणूक प्रक्रिया आयज पुराय जातली.
186 पंचायतींतल्या 62 पंचायतींचे सरपंचपद बायलां खातीर राखीव आसा. ते भायर 64 पंचायतींचें उपसरपंचपद बायलां खातीर राखीव आसा. बायलां खातीर राखीव आशिल्ल्या पंचायतींचे सरपंच लागीं लागीं निश्चीत जाल्यात. भोवसंख्य पंचायतींचेर भाजपा समर्थक उमेदवार वेंचून आयल्यात. हाका लागून त्या उमेदवारांक सरपंचपदाचेर बसोवपाचे यत्न मंत्री तशेंच भाजपा आमदारांनी सुरू केल्यात. काल मेरेन अपक्षांक थातारपाचें सुरू आशिल्लें.
186 पंचायतीं खातीर 10 ऑगस्टाक मतदान जाल्लें. 12 ऑगस्टाक मतमेजणी जाली. 186 पंचायतींचेर 1528 पंच वेंचून आयले. तातूंतले 64 पंच बिनविरोध वेंचून आयल्यात. दिग्गजांक हारोवन खूबशा पंचायतींचेर नवे उमेदवार वेंचून आयल्यात. हे खेपें बायलां पंचांचें प्रमाण वाडलां. कांय पंचायतींनी अर्द्यो पंच वांगडी बायला आसात. बायल पंचांचें प्रमाण 44 टक्के आसा.
पंचायतींचें इकरा, णव, सात आनी पांच अशे प्रभाग आसात. दरेकी पंचायतींत एक वा दोन उमेदवार वेंचून आयल्यात, जांचो पॅनल वा राजकी पक्षा कडेन संबंद ना. ह्या अपक्षांक आपले वटेन ओडपाचे नेटान यत्न सुरू आसात. अपक्षांनी थारायलें जाल्यार आमदार आनी मंत्र्यांचीं गणिता निमाण्या खिणाक चुकपाची शक्यताय आसा.
साल्वादोर द मुंद, पेन्ह द फ्रान्का, सुकूर ह्या पंचायतींचेर पर्यटन मंत्री रोहन खंवटे हांचे समर्थक सरपंच जातले. सांकवाळ, बोगमाळो पंचायतींचेर मंत्री मॉविन गुदिन्हो हांचे समर्थक सरपंचपदाच्या कदेलाचेर बसपाचे लागीं लागीं निश्चीत जालां. वाळपय तशेंच पर्यें मतदारसंघातल्यो सगळ्यो पंचायती भलायकी मंत्री विश्वजीत राणे हांच्या ताब्यात उरतल्यो. होंडा पंचायत सोडली जाल्यार हेर पंचायतींचे सरपंच निश्चीत जाल्यात. पंचां मदल्या मतभेदांक लागून होंडा पंचायतीचे सरपंचपद थारपाक आडखळी आसा.
सांताक्रुज, मेरशी आनी चिंबल पंचायतींचेर शेक मेळोपाचे यत्न मंत्री बाबुश मोंसेरात हांणी चलयला. अपक्षांचो तेंको मेळोवपाची तांची रणनिती आसा.
कला आनी संस्कृती खात्याचे मंत्री गोविंद गावडे, उदका पुरवण खात्याचे मंत्री सुभाष शिरोडकार, भौशीक बांधकाम खात्याचे मंत्री निलेश काब्राल हांणी लेगीत मतदारसंघातल्यो पंचायती ताब्यांत दवरपाचे यत्न चलयल्यात.
गावडोंगरी सोडली जाल्यार काणकोण मतदारसंघांतल्या सगळ्या पंचायतींचेर सभापती रमेश तवडकार हांचे समर्थक वेंचून आयल्यात. पैंगीण, श्रीस्थळ, खोतीगांव, लोलयें, आगोंद ह्या पंचायतींचेर भाजप समर्थक पंच सरपंच जावपाचीं चिन्नां आसात. लोलयें, पोळें, श्रीस्थळ, मोरपीर्ल, बेतूल, शेल्डें, रिवण, सावड्डें, उगें, साकोड्डें, माजोड्डें, साकवाळ, वेळसांव, वेर्णा, कोलवें, पाड्डें, दवर्ली, सां जुजे दी आरीयल, सालझोरा, सुरावली, तळावली, वार्का आनी वेळ्ळी पंचायतींतलें सरपंचपद बायलां खातीर राखीव आसा. ते भायर पंचवाडी, कवळें, शिरोडें, वेलींग, वाघुर्मे, तळावली, पोरणें गोंय, सां मातियास, शिरदोण, सांताक्रुज, सांत इस्तेव, आगशी, नगरगांव, केरी, पर्यें, सावर्डे, मुळगांव, पिळगांव, साळ, शिरगांव, सुर्ला, वेळगें, पालयें, केरी, तोरसें, तुयें, वारखंड, विर्नोडें, पिळर्ण, रेईश मागूश, रेवोडें, साल्वादोर द मुंद, सांगोल्डें, शिवोली, शिरसय, सुकूर, पोंबुर्फा, उसकय, वेर्ला- काणका पंचायतींचें सरपंचपद बायलां खातीर राखीव आसा.
मुख्यमंत्र्यांची सांखळेंतल्या पंचां कडेन चर्चा
मुख्यमंत्री डॉ. प्रमोद सावंत हांच्या सांखळी मतदारसंघांत पाळी- कोठंबी, वेळगें, सुर्ला, आमोणें, न्हावेली, कुडणें आनी हरवळें पंचायतींचो आस्पाव जाता. दरेकी पंचायतींत दोन ते तीन अपक्ष उमेदवार वेंचून आयल्यात. मुख्यमंत्री डॉ. प्रमोद सावंत हांणी सगळ्या पंचां कडेन चर्चा केल्या. अपक्षांनी भाजप समर्थकांक तेंको दिवचो अशें यत्न सुरू आसात.
मायकल लोबो कडेन तीन पंचायती
काँग्रेसीचे आमदार मायकल लोबो हांच्या हातांतल्यान कळंगूट पंचायत गेल्यात जमा आसा. पर्रा, कांदोळी आनी सांगोल्डें पंचायतींचेर मात मायकल समर्थक पंच वेंचून आयल्यात. हाका लागून तीन पंचायतींचेर मायकलाचो शेक उरतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
