अनुदानीत शिक्षण संंस्थांंच्या कर्मचाऱ्यांंकूय मेळटलो घर रीण येवजणेचो लाव

भांगरभूंय | प्रतिनिधी

पणजी : सरकारी शिक्षण संंस्थांं सयत अनुदानीत शिक्षण संंस्थांंचे शिक्षक तशेंच कर्मचाऱ्यांंक सरकाराच्या घर रीण येवजणेचो लाव मेळटलो. घर रीण येवजणेंत ही तजवीज जातली. शिक्षण संंचालक शैलेश जिंंगडे हांंणी ही म्हायती दिली.

सरकारान नवीन घर रीण येवजण सुरू केल्या. हे येवजणे खातीर अनुदानीत शिक्षण संंस्थांचे शिक्षक तशेच कर्मचारी अर्ज करूंक शकतले. इतले मजगतीं, शिक्षण संंस्थांंच्या ज्या कर्मचाऱ्यांंनी पयलींचे येवजणेचो लाव घेतला तांंणी अर्ज भरून सविस्तर म्हायती दिवची पडटली. अर्थीक फांट्यान परिपत्रक जारी केलांं. निवृत्तीची तारीख, हप्त्याची रक्कम, सेवेचो काळ अशी सगली म्हायती अर्ज भरून दिवची पडटली.

सरकारी कर्मचाऱ्यांंक 2 टक्के कळंंतरान घरा खातीर रीण घेवपाची येवजण खूबशीं वर्सां सुरू आसली. कोरोनाक लागून मे 2020 वर्सा ही येवजण बंंद केली. हाचो सरकारी कर्मचाऱ्यांंक व्हड प्रमाणांत फटको बसलो. येवजण बंद करपाच्या निर्णयाक संंघटणेन खंडपिठांत आव्हान दिल्लें. कोरोनाचे संंकश्ट देंवले उपरांंत सरकारान परतून येवजण सुरू केली.

सुधारीत येवजणे प्रमाण सरकारी कर्मचाऱ्याक पयलीं भशेन 2 टक्के कळंतर फारीक करचे पडटले. ते भायर रिणाची मूळ रक्कम फारीक करची पडटली. हेर रक्कम सरकार फारीक करतलें. सरकार कर्मचारी निवृत्त जाय मेरेन वा चडांत चड 20 वर्सां मेरेन आपली रक्कम फारीक करतलें.

घरा खातीर रीण दिवपी येवजण सरकारान 1988 वर्सां सुरू केल्ली. मे 2020 वर्सा ती येवजण बंद जाल्ल्यान देड हजार कर्मचाऱ्यांंक फटको बसलो. हाका लागून कांय कमचाऱ्यांंक न्यायालयांत वच्चें पडलें.