भांगरभूंय | प्रतिनिधी
पुस्तक परिक्षण
गोवा कोंकणी अकादेमी ‘अनन्य’ ही स म्हयनाळी साहित्य पत्रिका उजवाडाक हाडटा. हे पत्रिकेचो सोळावो अंक (जानेवारी ते जून 2022) 20 आगस्ट 2022 ह्या कोंकणी राष्ट्र मान्यताय दिसा, कोंकणी अकादेमीन पणजेंत घडोवन हाडिल्ले खाशेले कार्यावळींत ज्ञानपीठकार दामोदर मावजो हांचे हस्तुकीं उजवाडाक आयलो. ‘अनन्य’ हो गोवा कोंकणी अकादेमीचो तोखणायेचो उपक्रम आसा.
अनन्याचो हो सोळावो अंक कविता विशेशांक’ म्हूण उजवाडाक आयला. विंगड-विंगड विशय आनी प्रयोगांनी कोंकणी कविता नटिल्ली आसा. एकाच साहित्य प्रकाराचेर खास अंक काडप आनी तोवूय बी कवितेचेर ही दिसता तितली सादी गजाल न्हय. कोंकणी कवितेची वळख अभ्यासकांक आनी वाचकांक जावची असो हेत आसा. हातूंत वट्ट 21 कवींच्यो 87 कविता आसात. जेश्ट आनी नवोदीत कवीच्या कवितांचो तातूंत आसपाव आसा. हो सुंदर समतोल सादला. तेच बरोबर कोंकणीची नामनेची कवियत्री ग्वादालूप डायस हांचो ‘एकविसावो शेंकडो आनी अस्तुऱ्यांची कविता’ हो बायलांच्या कविता लेखनाची फोडणिशी करपी लेख आसपावला. हो लेख अभ्यासपूर्ण आसा आनी देखदिणो आसा. सर्वंकश आनी सर्व-आस्पावीत असो हो लेख.
अनन्याचो हो अंक साहित्याच्या साबार पतींनी नटला. ‘चौकेर’ ह्या सदरांत मूळ केरळ पूण उपरांत गोंय आनी मंगळुरा कडेन आपलें नातें घटमूट केल्ले जेश्ठ कोंकणी कथाकार गोकुळदास प्रभू हांची सखाराम शेणवी बोरकार हांणी दीर्घ मुलाखत घेतल्या. हे मुलाखतींत गोकुळदास प्रभू हांचे साहित्यीक वाटचालीची झलक मेळटा. पूण तेच बराबर तांचे हे मुलाखतींतल्यान सुमार साडेचारशें वर्सां आदीं पुर्तुगेजांच्या धर्म छळांतल्यान आपली भास आनी संस्कृताय राखून दवरपा खातीर आपली मूळ भूंय गोंय सोडून गेल्ले आनी कोची-केरळांत स्थायीक जाल्ल्या गोंयकारांचे उमाळेय व्यक्त जातात.
‘कथामंच’ ह्या सदरांत नामनेची जेश्ठ कथाकार जयमाला ना. दणायत हांची ‘जगमां…’ ही कथा आसा आनी ती वाचनीय जाल्या. आयच्या भुरग्यांक जगमां म्हणजे कितें तेंच खबर ना जालां. जगमां बाजारांत विकतीं लेगीत मेळनात. हुंदरा हुंदरा मोव कर, चानये चानये गोड कर, अशें म्हणत आडूक जगमां गोड करून खावपाची चाल आशिल्ली.
‘भाशा भावकी’ ह्या सदरांत डॉ. गजानन मडिवाल हांच्या मूळ कन्नड नाटकाचो डॉ. जयंती नायक हांणी केल्लो अणकार आनी नामनेचे कन्नड कवी तिरुमलेश हांच्या कविते संबंदांत लेखाचो मेल्विन रॉड्रीगस हांणी केल्लो अणकार आसपावला.
‘मंथन’ सदरांत ग्वादालूप डायस, गौरांग बाबूराव भांडिये, नमन सावंत धावस्कार आनी डॉ. सुषमा अशोक आरुर हांचे म्हायतीपुर्ण लेख आसात. ‘लोकवेद’ ह्या सदरांत डॉ. जयंती नायक हांणी दोन दुर्मीळ लोकगितांचें संकलन केलां. ‘ग्रंथदालन’ ह्या सदरांत कमलाकर म्हाळशी हांणी कवी आर. रामनाथ हांच्या ‘विस्तव’ ह्या कविता झेल्याची केल्ली समिक्षा आसपावल्या.
214 पानां आशिल्ल्या ह्या भरगच्च अंकाचें मुखचित्र आनी फाटलें चित्र कवी गितेश शिंदे हांचीं आसात आनी हीं चित्रां अंकाची सोबाय वाडयतात. भितरलीं रेखाचित्रां कमलेश मेस्त्री हांची आसात.
ह्या अंकाचें संपादन डॉ. जयंती नायक हांणी केलां. पुराय अंक सामको वाचनीय जाला, त्या खातीर जयंतीबायक परबीं. एक खोशयेची गजाल म्हळ्यार ‘अनन्य’ ह्या साहित्य पत्रिकेक यू.जी.सी. (University Grant Commisson च्या ‘कॅर’ वळेरेंत (CARE LIST) मान्यताय आनी सुवात मेळ्ळ्या. सगल्या कोंकणी शिक्षक आनी संशोधकांक भांगराळी संद आसा. ह्या अंकांत संशोधनात्मक पेपर बरोवपाची. ह्या जैतांतलें मुखेल स्रय संपादक डॉ. जयंती नायक हांकां दिवपाक जाय.
***
‘अनन्य’: स म्हयनाळी साहित्य पत्रिका (जानेवारी ते जून 2022)
प्रकाशक: सचिव, गोवा कोंकणी अकादेमी, पणजी-गोंय.
पानां: 214, मोल: 70 रुपया
– सखाराम शेणवी बोरकार
9923306751
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
