भांगरभूंय | प्रतिनिधी
काँग्रेसीचो आरोपः म्हापश्यां सत्याग्रह धरणें आंदोलन
भांगरभूंय । प्रतिनिधी
म्हापशें: भाजपा सरकारान हे आदीं नोटबंदी लागू करून देशाक अर्थीक संकटांत उडयलो. अग्निपथ येवजण चालीक लावन हें सरकार आतां बेरोजगारीक उर्बा दिता. समाजाचें सैनिकीकरण करपाची ही येवजण आसा. समाज आनी सैन्या खातीर ही धोक्याची सुलूस आसा. हे सरकार सैन्य आनी ताचे उर्जेक दुबळें करपाक सोदता, असो आरोप काँग्रेस प्रदेश महिला अध्यक्ष बिना नायक हांणी केलो.
म्हापश्यां सोमारा सांजे वेळार केंद्र सरकाराचे अग्निपथ येवजणेचो विरोध करचे खातीर काँग्रेस पक्षान गांधी चौकांत सत्याग्रह धरणें आंदोलन केलें. ह्या वेळार नायक उलयताली. तांचे वांगडा म्हणयारे अमरनाथ पणजीकार, संजय बर्डे, युवा प्रदेशाध्यक्ष वरद म्हाड्डोळकार, उत्तर गोंय जिल्होध्यक्ष विरेंद्र शिरोडकार, नगरसेवक सुधीर कांदोळकार, अॅड. शशांक नार्वेकार आनी हेर कार्यकर्ते हाजीर आशिल्ले. ह्या सत्याग्रह आंदोलनाक बार्देश म्हालांतले चारूय काँग्रेस आमदार गैरहाजीर राविल्ले.
ही येवजण म्हणल्यार एक नाटक. परिणामांचो विचार करिनासतना केंद्र सरकारान ही येवजण हाडल्या. सरकारा कडेन दूरदृश्टीचो उणाव आसा. चार वर्सां उपरांत ह्या भुरग्यांचो फुडार कितें आसतलो? काम नाशिल्ल्यान हो युवा वर्ग मानसीक तणावांत वावुरतलो, असो दावो नायक हांणी केलो.
वरद म्हाड्डोळकार हांणी सांगलें, ही येवजण येता ते लोकसभा वेंचणुके खातीर दाखयिल्लें हांयस. हे येवजणेक लागून देशांतली बेरोजगारी दुपेटीन वाडटली. हे येवजणेंतल्या 25 टक्के तरणाट्यांक परतून सेवेंत घेतले, अशें सरकार सांगता, पूण ताचो भरवसो ना. हे येवजणेच्या माध्यमांतल्यान सरकार बेरोजगार तरणाट्यांच्या घाया वयली खवळी काडटा, असो आरोप तांणी केलो. केंद्र सरकारान दोन कोटी नोकऱ्यांचें आस्वासन दिल्लें, पूण प्रत्यक्षांत भाजपा सरकाराक तें पुराय करपाक जालें ना. 27 लाख पदां रितीं आसतना 10 लाख नोकऱ्यो दिता, अशें सांगतात. ते भायर अग्निपथ येवजणेच्या माध्यमांतल्यान सरकार तरणाट्यांक फटयता. चार वर्सां उपरांत सगळ्या अग्निविरांक सेवेंत घेतले, अशें लेखी आस्वासन सरकारान दिवचें, अशी मागणी अमरनाथ पणजीकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
