भांगरभूंय | प्रतिनिधी
भारतान दुसरे वन डे मॅचींत येजमान वॅस्ट इंडिजाक 2 विकेटींनी हारोवन तीन मॅचींचे माळेंत 2-0 अशी निर्णायक आघाडी घेतली.
भारता वतीन अक्षर पटेलान अर्द शेंकड्याची खेळी केली. ताच्या ह्या प्रदर्शनाच्या नेटार भारतान 312 धांवड्यांची मोख 49.4 ओव्हरींनी मेळयली. ताणें सको मारून भारताक जैत मेळोवन दिलें. ताणें 35 बॉलांनी नाबाद 64 धांवड्यांची खेळी केली.
ह्या जैता सयत भारतान वॅस्ट इंडिजा आडची सेगीत 12वी माळ जिखून एकाच पंगडा आड सगल्यांत चड मालो जिखपाचो संवसारीक विक्रम आपल्या नांवार केलो. ताणे पाकिस्तानाचो विक्रम मोडलो. पाकिस्तानान झिम्बाब्वे आड सेगीत 11 माळो जिखिल्ल्यो.
वॅस्ट इंडिजान दिल्ले 312 धांवड्यांचे मोखीचो फाटलाव करतना भारतान बरी सुरवात केली. पयले विकेटी खातीर भारतान 42 धांवड्यांची भागिदारी केली. पूण, मुखेली शिखर धवन 13 धांवड्यो करून बाद जालो. ताच्या फाटोफाट 43 धांवड्यांची आक्रमक बॅटींग करपी शुभमन गिल लेगीत तंबूंत परतलो.
दोनूय ओपनर तंबूंत परत गेल्या उपरांत सुर्यकुमार यादव आनी श्रेयस अय्यर ही जोडी खेळपट्टीचेर आशिल्ली. पूण, सुर्यकुमार यादव वैयक्तीक णव धांवड्यांचेर मायेर्साच्या बॉलाचेर बोल्ड जालो. ते उपरांत अय्यर आनी संजू सॅमसन हाणें चवथे विकेटी खातीर 99 धांवड्यांची भागिदारी केली.
अखेरीक ही जोडी अल्झारी जोसेफान फोडली. ताणें अय्यराक 63 धांवड्यांचेर बाद केलो. ताच्या फाटोफाट सॅमसन लेगीत 54 धांवड्यो करून धांवबाद जालो. ते उपरांत दीपक हुड्डा आनी अक्षर पटेल हांणी अर्द शेंकड्याची भागिदारी करून पंगडाक 250चो टप्पो हुपून दिलो. ही जोडी जम बसयता आसतना अकील हुसैनान दीपक हुड्डाक 33 धांवड्यांचेर बाद केलो.
मजगतीं, अक्षर पटेलान डावाची सगलीं सुत्रां आपल्या हातांत घेतली. ताणें चवके आनी सक्यांचो पावस घालीत मॅच भारता वटेन हाडली. पूण, दुसरे वटेन शार्दुल ठाकूर 3 धांवड्यो करून बाद जालो. अक्षरान मॅचींत 18 बॉलांनी 19 धांवड्यो अशी हाडली. ताच्या वांगडा आवेश खान लेगीत 12 बॉलांनी 10 धांवड्यो करून ताका बरी साथ दिली. अखेरेक सात बॉलांनी जैता खातीर आठ धांवड्यांची गरज आसतना तो बाद जालो.
निमाणे ओव्हरींत जैता खातीर आठ धांवड्यांची गरज आशिल्ली. ही ओव्हर मायेर्स घालपाक आयलो. पयल्या बॉलाचेर एकूय धांवडी आयली ना. दुसऱ्या आनी तिसऱ्या बॉलाचेर पटेल आनी सिराज हांणी दरेकी दोन धांवड्यो केल्यो. मॅच तीन बॉलांनी स धांवड्यो अशी जाली. पटेलान मायेर्साक सको मारून मॅच सोंपयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.