भांगरभूंय | प्रतिनिधी
पत्रभूंय
मानादिक पूर्णानंदबाब,
अध्यक्ष, कोंकणी अकादेमी
नमस्कार.
सरकारान कोंकणी अकादेमीचें अध्यक्षपद तुमकां दिलां. तुमीय राजभास कोंकणी पासत वावुरिल्ले फुडारी, कार्यकर्ते. तुमी गोंयची राजभास आनीक उंचायेर पावयतले अशी आस्त आसा. सरकारान पुराय विचारांतल्यान आनी फुडाराचें चिंतून तुमचे कडेन अध्यक्षपद दिलां. तुमी जापसालदारकी घेवपी, उंचेल्या पावंड्याचें शिक्षण घेतिल्ले. तुमी शिक्षक, संशोधक राजभासेंतले.
कोंकणीचे म्हालगडे, आदले आमदार अॅड. उदयबाब भेंब्रे, ज्ञानपीठकार दामोदर (भाई) मावजो तुमचे मुखेल मार्गदर्शक. उदयबाबांचें ‘यादींचो कुरपणो’ पुस्तक वाचल्यार तुमकां कोंकणी अकादेमी खातीर कितें करपाचें आसा ताची जाणवीकाय जातली. राजभास कोंकणींतल्यान कथा, कविताच न्हय हेर संशोधनात्मक लिखाणाच्या पुस्तकांची बांदावळ करपाची गरज आसा. कांय आदल्या पुस्तकांची परतून उजवाडावणी जाय. राजभासेंतल्यान गोंय मुक्ती आदीं, शेंकड्यांनी वर्सांनी जाल्लें लिखाण अजरंवर अशेंच. कथा, कविता, निबंदांच्या झेल्यां भायर नाटक, नाटकुलीं, बालगीतां, गीतां, आरती, आल्लयो, राजकारण, अर्थकारण, राजभासे पासत वावुरिल्ले, झगडिल्ले म्हालगडे आदीं विशयांचेर संशोधनांतल्यान पुस्तकां उजवाडावपाची गरज आसा. ‘अनन्य’ नेमाळ्याचे चार वर्सुकी आंक उजवाडावपाचेर, तशेंच कोंकणी पुस्तकां संवसारांत लोकां मेरेन पावोवपाचेर तुमी चड लक्ष दिवचें.
वाचन म्हणल्यार गिन्यानच न्हय आनंद, खोस. भुरगेपणां सावन वाचनाची गोडी लागची, नव्या तंत्रज्ञानांतल्यान पुस्तकां मेळचीं, तीं देख दिवपी आसचीं ही म्हायतीती कोंकणी अकादमीक करुन दिवपापासत म्हालगडे आसात. जड पुस्तकां परस तीं वजनान ल्हान, गिन्यानाचें पेटूल, समाज सुदारपाक आधार जातलीं हें तंत्रज्ञान अकादमीन लेखकांक शिकोवपाक जाय.
अकादमीचे उत्तर, दक्षीण गोंयांत विभाग जाय, मठग्राम आनी भतग्रामात वर्साभितर. विभाग खाशेले, चकचकीत, झगझगीत आसचे परस ते हेर सरकारी कचेरेंतल्या ल्हानशा सभाघरांतल्यान दिसप म्हत्वाचें. कोंकणी पासत मोन्यांनी वावुरपीय संस्था, कार्यकर्ते, संघटना आसात त्यो तुमकां दिका दाखयतल्योच.
– सुहासिनी प्रभुगांवकार
पणजी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
