भांगरभूंय | प्रतिनिधी
भांगरभूंय । प्रतिनिधी
पणजीः भारताच्या दुस्मान राष्ट्रान सुरू केल्ल्या प्रॉक्सी झुजाक लागून अंतर्गत सुरक्षा हें देशा सामकाराचें सगल्यंत व्हड आव्हान आसा अशें गोंयचो पुलीस म्हासंचालक जसपाल सिंग हांणी सांगलां. कारगील विजय दिसा निमतान पणजे आझाद मैदानार आशिल्ल्या हुतात्मो यादस्तिकाचेर फुलां चक्र ओपले उपरांत ते उलयताले. अखील गोंय आदल्या सैनीक कल्याण असोसिएशनान ही कार्यावळ आयोजीत केल्ली.
कागगील झुजा निमतान संवसाराक भारताची लश्करी ताकद दिसून आयली. दुस्मानांक आमच्या सैनिकांनी जशाक तशें अशी जाप दिवन धांवडान घातलें. तरणाट्या सैन अधिकाऱ्यांनी ह्या झुजांत आपलो पराक्रम दाखयलो. देशा विशीं आपलो मोग दाखोवपा खातीर तरणाट्यांनी सुरक्षा दलांत सेवा करपाची संद सोडपाक जायना. लश्करांत वचून देश सेवा करपाची सगल्यांत बरी संद मेळटा. सध्या लश्करांत अधिकाऱ्यांचो उणाव आसा अशें सिंग हांणी सांगलें.
दुस्मान देशान सुरू केल्ल्या प्रॉक्सी झुजाक लागून सुरक्षा दलाचेर सामकें चेंपण आसा. श्रीनगर, उत्तर आनी पूर्वेंक ते खातीर निमलश्करी दल आनी पुलिसां वांगडा काम करचें पडटा अशें तांणी सांगलें.
सुरवेक जसपाल सिंग, सैनीक कल्याण असोसिएशनाचो अध्यक्ष अनंत जोशी, सैनीक कल्याण खात्याचो सचीव लेफ्टनंट कर्नल वेणुगोपाळ नायर, कमांडींग ऑफिसर गोंय 1 बटालियनाचो मनोज राठोड आनी पणजेचो महापौर रोहीत मान्सेरात हांणी यादस्तिकांक फुलां चक्रां ओपलीं. कारगील झुजा संबंदी आयोजीत केल्ल्या सर्तींतल्या जैतिवंत विद्यार्थ्यांक ह्या वेळार इनामां भेटयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
