भांगरभूंय | प्रतिनिधी
नेम मोडल्यार गुन्यांव दाखल करपाचो शिंपणावळ खात्याचो आदेश
भांगरभूंय । प्रतिनिधी
वाळपय : सैमाचो सुंदर आविश्कार निर्माण करपी अंजुणें धरणाच्या उथळ पात्राच्या वाठाराक मिनी काश्मीर म्हूण वळखतात. थंयचो सैम अणभवपाक पर्यटकांची आनी सैममोगींची वाडटी संख्या पळोवन शिंपणावळ खात्यान ताची दखल घेतल्या. ह्या वाठारांत वचपाक खात्यान पुराय बंदी घातल्या. जर कोणूय ह्या वाठारांत वचत जाल्यार तांचे गुन्यांव दाखल करपाचे आदेश वाळपय पुलिशेक दिल्यात.
अंजुणें धरणाच्या उथळ पात्राच्या वाठारांत पावसाक लागून पुराय पाचवेंचार जालां. हाका लागून फाटल्या दोन म्हयन्यां सावन व्हड प्रमाणांत पर्यटक, तरणाटे, सैममोगी ह्या वाठाराक भेट दितात. थंय फोटोग्राफी करून फोटो, व्हिडियो सोशल मिडियाचेर घालतात. हाका लागून हो वाठार मिनी काश्मीर म्हूण फामाद जाला. फाटल्या म्हयन्या सावन जाल्यार ह्या वाठाराक भेट दिवप्यांची संख्या सुमारा भायर वाडल्या.
हो वाठार अभयारण्याचो भाग आशिल्ल्यान ह्या वाठारांत वावुरपी रानवटी जनावरांक त्रास जाता, तांकां आडखळ जाता. हे खातीर जैवविविधतायेक धोको निर्माण जावपाक लागला. अभयारण्य वाठारांत वचप कायद्यांत बंदी आसिल्ल्यान ह्या वाठारांत लेगीत बंदी घातल्या. ह्या वाठारांत बिबटे, रानदुकर, गवे, पट्यांचे वाग, वांस्वेलांचो वावर आसा.
शिंवणावळ खात्याचे वरिश्ठ अधिकारी दिलीप नायक हांणी हे संबंदांत आपली प्रतिक्रिया दितना सांगलें, ह्या वाठारांत वचप खुबूच घातक आसा. हो भाग अंजुणें धरणाच्या उदकाच्या सांठ्याचो म्हत्वाचो भाग. ह्या वाठारांत वावुरपी रानवटी जनावरांच्या राबित्याक धोको उप्रासूं येता. हेच खातीर ह्या वाठारांत वचपाक बंदी घातल्या.
पुलीस सुत्रां कडल्यान मेळिल्ले म्हायती प्रमाण, ह्या वाठारांत वचप्यां आड गुन्यांव नोंद करपाचे निर्देश शिंपणावळ खात्यान दिल्यात. ह्या वाठारांत वचपी वाटेर पुलीस गस्त दवरल्या. सध्या पावसान नेट धरला. दोंगराळ वाठारांत उटंगाराचो पावस पडटा. दोंगरा वयलें व्हड प्रमाणांत उदक धरणांत येवपाक लागलां. ताका लागून उदकाची पातळी वाडपाक लागल्या. हे खातीर ह्या वाठारांत वचप घाताचें आसा. उदकाच्या सांठ्याचो उथळ भाग चिखलान भरला. ते खातीर कोणूय तातूंत आडकू येता, अशें शिंपणावळ खात्यान म्हणलां.
दोन म्हयन्यांत सोशल मिडियाचेर फामाद
अंजुणें धरण प्रकल्प उबारला त्या वाठारांत गुळ्ळे, पणसुली अशे गांव वशिल्ले. धरण प्रकल्प उबारचे आदीं तांकां मोर्ले वसणुकेंत स्थलांतरीत केले. धरणांतल्या उदकाची पातळी देंवले उपरांत हे गांव स्पश्टपणान दिसतात. अंदूं पावसांत पुराय वाठारान पाचवीचार चादर पांगुरले वरी दिसता. हे खातीर हो वाठार मिनी काश्मीरा भशेन सैमीक नदरेन विकसीत जावपाक लागला. हेच खातीर फक्त दोन म्हयन्यां भितर सोशल मिडियाचेर हो वाठार ट्रोल जालो. हेच खातीर ह्या वाठारांत तरणाट्यांची संख्या गतीन वाडपाक लागली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
