भांगरभूंय | प्रतिनिधी
साळावली, पंचवाडी, गवाणे फुल्ल; चापोली भरपाचे वाटेर
भांगरभूंय । प्रतिनिधी
पणजी : गोंयांत फाटल्या कांय दीस पडिल्ल्या उटंगाराच्या पावसाक लागून अंजुणें धरणांतल्या उदकाचो सांठो गतीन वाडटा. बुधवारा अंजुणें धरणांतल्या उदकाचो सांठो 34 टक्के आशिल्लो. शेनवारा तातूंत 13 टक्क्यांनी वाड जावन तो 47 टक्के जाला. 5 जुलय मेरेन साळावली 114 टक्के, चापोली 84 टक्के, पंचवाडी 101 टक्के जाल्यार गवाणे धरणांत 100 टक्के तशेंच आमठाणे धरणांत 7 टक्के उदकाचो सांठो बाकी आशिल्लो.
शेनवारा गोंयांत पावसाचो नेट उणो आशिल्लो. भोवतेक वाठारांनी वत पावसाचो खेळ चलतालो. हवामान खात्यान गोंयांत 6 ते 11 जुलय मेरेन मध्यम स्वरुपाच्या पावसाची शक्यताय उक्तायल्या. ते खातीर ह्या स दिसां खातीर पावसाचो यलो अलर्ट जारी केला. गोंयांत 24 वरांत सरासरी 1.69 इंच पावसाची नोंद जाली. हे मजगतीं, धारबांदोड्यां 3.63 इंच, फोंड्यां 2.87 इंच, सांग्यार 2.18 इंच जाल्यार केप्यां 2.16 इंच पावसाची नोंद जाली. गोंयांत 1 जून ते 5 जुलय मेरेन सरासरी 44.47 इंच पावसाची नोंद जाल्या. अंदूं पावसाचें प्रमाण 2.9 टक्क्यांनी चड आसा. शेनवारा पणजे चडांत चड 30.8 अंश सेल्सियस जाल्यार उण्यांत उणें 24.8 अंश सेल्सियस तापमानाची नोंद जाली. मुरगांवां चडांत चड तापमान 30 अंश जाल्यार उण्यांत उणें तापमान 25.4 अंश सेल्सियस आशिल्लें. फुडले स दीस गोंयांतलें चडांत चड तापमान 31 अंश जाल्यार उण्यांत उणें 25 अंश सेल्सियस मेरेन आसपाची शक्यताय खात्यान उक्तायल्या.
4 केंद्रांनी पावसान हुंपले 40 इंच
गोंयांत 1 जून ते 5 जुलय मेरेन 14 मदल्या 4 केंद्रांनी पावसान 50 इंचांची सरासरी पुराय केल्ली. धारबांदोड्यां सगल्यांत चड 66.90 इंच पावसाची नोंद जाल्या. सांग्यार 56.46 इंच, वाळपय 53.83 इंच जाल्यार फोंड्यां 52.96 इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
