भांगरभूंय | प्रतिनिधी
भांगरभूंय । प्रतिनिधी
पणजीः गोंय विद्यापिठांतल्या विद्यार्थी कल्याण खात्याचो संचालक आनी पदव्युत्तर विद्यार्थी संघटनेच्या वेंचणूक समितीचे मुखेली प्रा. अँथनी व्हिएगश हांका धमकी दिवपी शिशीर परब ह्या विद्यार्थ्यांचेर कारवाय जाय मेरेन गोंय विद्यापिठाच्या कसलेय वेंचणुकेंत सहकार्य करचे नात, अशी भूमिका विद्यापीठ शिक्षक संघटनेन घेतल्या. संघटनेच्या वांगड्यांनी सोमाराक एकठांय येवन ते घडणुकेचो निशेध केलो
शिक्षक संघटनेचो अध्यक्ष प्रा. रामाराव वाघ हाणे पत्रकारांक ही म्हायती दिली. फाटल्या शेनवारा पदव्युत्तर विद्यार्थी संघटनेच्या वेंचणूक उमेदवारी अर्जांची छाननी आशिल्ली. त्या वेळार शिशीर परब परवानगी नास्तना इमारतींत रिगलो. ताणे थंय आशिल्ल्या कार्मचाऱ्यांक गाळी सोवल्यो. उपरांत व्हिएगश हांका थंय आपयले तेन्ना परब हाणे ताकाय गाळ्यो सोवून धमकी दिली अशें वाघ हाणे सांगलें.
फाटल्या ऑगस्टांत लेगीत असोच प्रकार जाल्लो. शिक्षक संघटनेन खर कारवाय करपाची मागणी केल्या उपरांत ताचे आड एफआयआर दाखल केल्लो. आतांत ताचे आड एफआयआर दाखल केल्ल्याचं विद्यापीठ प्रशासनान सांगला. मात ताची कॉपी पळयले बगर आमचो ताचेर विस्वास दवोरचे नात तशेंच वेंचणुकेंत सहकार्य करचे नात अशें वाघ हाणे स्पश्ट केलें. राजकी पक्षांचो आशिर्वाद आसले बगर एकाद्रो विद्यार्थी इतली मस्ती करपाक शकचो ना अशें वाघ हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
